2010年11月27日
頤和園→羊大爺涮肉→圓明園→花家怡園
在北京的第二日, 我地一大早起身, 第一個去既行程係頤和園. 我自己一直都好中意了解一些清代的事. 好中意聽下一些野史. 所以北京的每一個景點, 對於我來說都係非常有趣. 在去頤和園的途中, 見到鳥巢。
頤和園 Summer Palace
頤和園係國內保存得最完整, 面積最大, 古蹟最多的皇家園林. 頤和園原名清漪園, 係清代最著名的三山五園之一. 慈禧太后當年挪用海軍軍費重修. 令到我地甲午戰爭都輸埋既. 就係呢個頤和園.
我地由頤和園的正門東宮門入 , 先經過仁壽門去到仁壽殿.
仁壽殿--光緒同埋慈禧太后都係在呢道聽政和接見大臣.
我地去到昆明湖之後, 見到知春亭. 十二年前的北京之旅. 同樣係十一月, 但當年的昆明湖已經結了冰. 十二年後的今日. 雖然好凍, 不過仍未有結冰的跡象.
我地先向左走, 去睇銅牛, 南湖島和十七孔橋. 十七孔橋連接南湖島. 我地經過十七孔橋, 到島上參觀.
南湖島是園內最大島嶼, 主要景點有龍王廟和涵虛堂
龍王廟
涵虛堂--慈禧太后曾經在呢道檢閱水師學堂的操練, 而家裡面就放左清朝唔同皇帝的照片. 當然唔分小得慈禧太后啦.
銅牛-- 乾隆皇帝在牛身上題字. 說明左建牛治洪水之意.
嘩..真係好凍....仲要好大風. 我同男友都頂唔順了. 去搵間餐廳坐下暖下先. 去到一間餐廳. 真係要驚訝而家國內同胞的消費指數. 一杯咖啡￥20-￥25. 一杯茶￥15. 呢個價在香港算正常. 不過在大陸就.....我叫左一杯茶. 只係用一隻紙杯, 比左一杯用茶包泡的茶我. 連真正茶葉都冇. 男友杯咖啡更加唔駛講...灰....
離開餐廳, 我地繼續出發. 望見佛香閣. 我的目的地.
玉瀾堂--光緒皇帝的寢宮, 亦係佢維新變法失敗後的囚室.
宜藝館--光緒皇后的寢宮
樂壽堂--慈禧太后的寢宮
我同男友去到樂壽堂, 我叫佢影張相, 話比佢知呢個就係慈禧太后的寢宮了. 男友話 : 頭先咪影左囉. "-" 佢以為係仁壽殿. 慈禧太后聽政的地方. 其實對於某些人來說. 的確是間間房都一樣.
長廊--由東面邀月門起至西面石亭止. 長七百幾米.
佛香閣
要上佛香閣, 需要另外購票. ￥10. 買了門票後, 入場了.
建築物屋頂都有一些動物(神獸), 不過就算好近睇, 都唔知係咩黎.
沿路行, 一直都係樓梯....好辛苦呀~~
不過辛苦都值得的. 因為可以在高處望下去. 感覺特別壯觀.
五方閣--在中央的建築物是一個銅亭.
再行左好多好多樓梯之後, 終於到左佛香閤.佛香閣入面有個金色的千手觀音. 但就唔比影相.
呢張相的感覺正是我鐘意北京的原因.
再上就係眾香界(一個牌樓)和智慧海(一個有觀音菩蕯像的殿)
清晏舫--又名石舫, 取意"水能載舟,亦能覆舟" 喻意大清王朝堅如磐石, 水不能覆. 夏天旳時候, 慈禧太后成日在艙內食早餐, 食宵夜.
睇完石舫之後, 我地就離開頤和園了. 我地在頤和園足足行了五小時. 但其實仍未睇得晒. 但因為我地仲要去其他景點. 唯有走馬看花了. 我地在北如意門出口離開, 已經一點半了. 好肚餓. 門口冇的士, 只有一些私人性質的包車(所以應該要在北宮門出, 北宮門一出就係公車站和地鐵站). 我地問佢去圓明園幾錢, 佢地開￥10. 都合理. 我地就上了佢地車. 坐車途中, 睇下旅遊書, 旅遊書介紹話圓明園附近有涮羊肉食. 我地就同個司機講, 去羊大爺. 佢話, 加多十元. 我最討厭這種被屈的感覺. 所以我都係去返圓明園. 再坐過另一部的士. 雖然都係比多十元, 不過條氣順些.
羊大爺涮肉
羊大爺附近就有一間東來順. 但我同男友都比較想試地道一點的店, 而且香港都有東來順啦. 去北京當然要試香港無的啦. 所以最後我地都係食羊大爺.
我地選了一個傳統+紅油鴛鴦鍋, 另外叫左幾種調味料. 在北京食涮羊肉調味料都會以芝麻醬為主. 我地試了傳統芝麻醬和香油蒜泥.
好味道
埋單都只110. 低食.
地址 : 北京市海淀區萬泉河路12號
沒有留言:
發佈留言