去玩長灘島返黎. 再報多一個廣東短線團同男友一齊去. 今次係我地第一次一齊參加旅行團. 原因為大航假期有一個3天團可以睇埋尹光音樂會, 所以男友先肯去. 如果唔係有尹光, 我地可能都係買套票自己去玩就算了. 不過今次參加左團我地都覺得唔錯啦. 有兩晚5星酒店住, 又有得食. 又唔駛PLAN行程, 最好就係o係旅遊車可以聽下人講野. 唔駛我地兩個坐長車咁悶.
呢個團係在深圳集合, 我地一團人都有成40幾人. 不過旅遊車就真係冇得彈. 飛機座椅咁. 坐長車一d都唔辛苦. 估唔到而家中國既旅遊車已經發展到呢個地部. 其實呢個團可以話冇咩行程. 而所謂既行程都只不過係一d免費景點. 所以可以好早返酒店, 第二日都可以好遲先出發. 呢一點都真係合晒我地心意. 其中一個景點係去浸溫泉. 我同男友對溫泉呢樣野都可以話毫無興趣. 所以當d團友去浸溫泉既時候, 我地兩個就自行返酒店. 晚餐都唔同佢地食. 我地離開左佢地之後, 就去左中山步行街行下. 在步行街. 見到到中山乳鴨同鯪魚球, 梗係又要食下啦.
之後去返酒店附近既KARAOKE唱歌. 導遊話佢地19:00PM會返到酒店. 我地就19:00PM在大堂等佢地. 攞左鎖時後, 我地上房休息一陣就出去搵食了. 其實在出發之前, 我上網已經搵左資料, 在酒店格離既商場就有一個京華食街. 有好多我地中意食既野. 而我地去唱KARAOKE之前都已經視察左環境, 仲已經諗定食咩. 不過...當我地再去到呢個食街既時候, 已經冇晒人了. 原來佢地收9點. 但當時都係8點半姐. 佢地已經收起晒D野了. 冇辦法. 唯有下次了. 我地在酒店附近搵到一間食水煮魚既店舖. 我地就決定在呢間餐廳解決我地個晚餐. 果然唔錯. 在大陸食水煮魚果然又平又有水準. 食飽飯. 我就就好滿足咁返酒店訓覺了.
水煮魚
香辣蝦
中山中華世紀酒店, 2009年開業. 以團費既價錢黎講, 真係冇得頂. 第二日在酒店大堂食早餐. 環境好, 食物選擇多. 真係物超所值. 午餐我地o係中山食脆肉鯇火煱. 嘩!! 唔係腩都咁脆呀. 冇得彈. VERY GOOD~~我地同其他團友都食得好開心. 而晚餐就係我地最期待既尹光音樂會. 音樂會既會場就在我地當晚住既酒店" 江門金凱悅大酒店" 雖然都係話5星, 不過比京華世紀就差得遠了. 好好彩. 我地果團安排坐最近表演台既位置.
菜單
尹光出場......
我地睇完個表演. 就坐的士去江門逸豪酒店唱KARAOKE. 在大陸唱左兩次KARAOKE. 不但價錢平. 環境好. 服務好. 音響仲超好. 好抵好抵. 男友就買左件蛋糕同我慶祝. 我都幾開心既. 玩到兩三點, 我地已經好眼訓了. 返酒店訓覺. 不過訓覺前仲要食埋我地同導遊訂既走地雞先. 唔記得70定80人仔一隻. 我地食完之後, 都好後悔點解訂得一隻咁小. 香港真係食唔到d咁好味既雞.
第三日, 話咁快就完了. 我地解散後去左樂園路食野. 去得樂園路就梗係食小龍蝦啦. 不過唔知係唔係時候, 間間都冇得食. 咁是但食D野就返去了. 呢個生日真係過得好充實.
沒有留言:
發佈留言