北韓(北朝鮮)第二日 開城 (板門店 / 高麗成均館) 平壤(萬景台 / 參觀學校 / 夜遊平壤市區)

10Jan2017 在北韓的第二日

一大早6:30 Morning Call，在酒店食早餐，對比尋晚的晚餐，早餐相對啱口味好多，至少有熱的粥和煎雞蛋，之後幾日的早餐也大至上差不多。

7:30AM 出發囉，離開羊角島，向高麗時代(918-1392年)的首都開城出發，終於都可以看到平壤市區的面貌啦。

我們團的旅遊車，是大陸的金龍車。

平壤市景，大同江，圖中的建築第分別為平壤大劇院和平壤飯店

 平壤市景

 今日上午的行程是去開城的板門店和高麗成均館，由平壤出發大約一小時四十五分鐘車程。

北韓通往開城的高速公路少少爛，但比我想像中的好很多。但公路上基乎沒有其他車，間中會見到北韓市民在公路上踏單車或者步行。

中途停了一個休息站，外面睇落幾靚，但裡面唔多掂，無水又無電。

10:30AM去到板門店，見到有另一部旅遊車，是香港中旅社，其實都真係幾多人去北韓旅行。我地兩個團被安排一齊行，其實我唔係咁中意，因為我唔中意人多。

在入口有間紀念品店，我們都買左平壤Tee. 之後可以一齊著黎影相。買唔夠十分鐘，就催我們走了，有個軍人帶住我們行，用韓文講解，再由我們的導遊用普通話翻譯，佢地不但止行得快，講得仲快，好多時候我行到去已經講完，又催我走了，根本上什麼都聽不到。

板門店內有曾經舉行過朝鮮停戰談判的會場，停戰協定簽署埸，38線和停戰委員會議室。

停戰協定簽署場 

停戰協定簽署桌

停戰談判會議室

這個碑刻著金日城在在生的最後時期，在有關統一的文件第一頁留下的親筆簽名。

 板門店的最後一站就是38線
圖中三間藍色小屋背後的建築物，是南韓的DMZ。

 圖中的一條就是38線

北韓的軍人

 我朋友送左幾包煙個軍人，所以個軍人願意同我影相。

 離開板門店之後，我們去了高麗博物館(高麗成均館)

高麗成均館是高麗時代儒教教育機關，裡面列出的是高麗時代的發展和歷史文物。但原建築於1592年壬辰衛國戰爭(壬辰倭亂)時被燒毀，今日見到的建築是在1602年修復的。

有點像南韓的景福宮 

 高麗時代的錢 

 據說當時高麗時代牛的價值比人的價值更高

怱怱忙忙參觀完高麗成均館，又到了購物時間，在高麗成均館門口有兩間賣紀念品的店舖，一間是賣明信片郵票等，另一間是賣人蔘。

我都買了一張明信片寄返香港，本以為可能要過三五個月或者永遠都不會收到，但竟然回港後一個月就收到了。

同團的90後都買了這些金氏郵票，我一點興趣都沒有，買左返屋企，最終會成為垃圾，所以影張相留念算。

另一間是賣人蔘的店舖，都幾貴，但同團90後買左好多呢隻人蔘軟糖，話好好味

是日午餐，真係嚇死人，我以為一碗二碗凍冰冰的只係前菜，原來主菜都係佢地。好彩在開城途中導遊問我們要不要自費加人蔘雞我們有加，否則就要捱餓。導遊話我們四個人加一隻便夠，因為比南韓的雞大隻，我們聽她講加一隻，真後悔，兩個人一隻就差不多，得一隻，唔夠食，反正這些一碗二碗凍冰冰的我沒有食。

食飽飯，買支朝鮮可樂飲，朋友話好難飲，但我又覺得差唔 多啫

飯後離開開城，返平壤，旅遊車在公路上越行越臭，原來架車有問題，導遊為左安全起見，叫我們全部落車，我們就無意中多左一個公路上自由活動的時間了。 

大家在公路上不停影相，但其實也有少少擔心的，如果架車修唔好，係唔係要叫平壤開架車黎接我地呢?　當時是一月，天氣好凍的，不過好彩過左一陣，香港中旅架車停低左，佢地接埋我們一起返平壤。

統一紀念塔，位於平壤～開城高速公路入口。穿過統一紀念塔，即是我們已經返到平壤，統一紀念塔，象徵南北韓的兩個女人舉著祖國統一三大獻章徽標。

返到平壤，我們先去參觀萬景台，即是偉大的金日城主席的出生地，據說現存的物品，都是金日城一家當年用過的物品。呢個景點，可以話係成個行程之中最無聊的。

在萬景台在落車的位置，有一個萬景台游樂場，據說占地70公頃，我們去到的時間，呢個遊樂場是沒有開的，我好奇問一問我們的領隊(我們的領隊已經去了北韓好多次)，來這麼多次有沒有見過這個遊樂場開？她話：沒有見過。咁....到低咩時候會開呢?

 

金日城主席的出生地

天黑了，還要繼續趕行程，最後一個行程是去參觀學校，難為一班小朋友咁夜都冇得放學。

可能這班學生年紀比較大，所以睇起來沒有電影中看的小朋友咁假，但真心覺得她們唱歌是好好聽的。

在這班小朋友當中，有一個是幾靚女的，但佢公然黑臉，仲發老師脾氣，我見到之後又覺得，都唔係咁冇自由啫，在遊客面前黑臉喎，容咩易會被罰架。小妹妹唔怕，可能是其實唔會罰。這班小朋友真是訓練十充的，在她們唱唱跳跳途中，突然停電，但停電對她們毫無影響，繼續歌照唱，舞照跳。

看完天才表演，去食晚餐，是日晚餐，石頭飯(無影相)，終於有熱食，好滿足。

原本食完晚飯就要返酒店，但團中的一班90後要求去行夜街，所以導遊就話一起去行夜街，行夠才一起返酒店。大家都好興奮，期待這個夜街會有咩新發現。旅遊車就停在市區馬路一旁，我們落車跟著導遊一起行，沿路是會見到北韓市民，但北韓市民對我們一點興趣都沒有，笑也不笑，望也不望。一直行......行.....行....好凍，又唔係比我們行入商店，就咁在條街行都唔知有咩謂。所以我同朋友都先上車好了。

我們就在呢道落車開始行

 感覺同一般城市無分別

雖然有點無聊，不過我一路行，一路問導遊問題，總算解答了我心中部份的疑問。

北韓(北朝鮮)第一日 平壤 開城 南浦市8天之第四日(向平壤出發)

2017年1月9日 出發，去北韓（北朝鮮）

早上八點半，旅行社職員相約我們在丹東火車站集合。

估唔到我們的團竟然也有十五人，當初仲驚會唔成團，十五人當中，大部份是中國國內的90後。

在過中國海關的時候，見到好多北韓人拿著大包細包行李排隊過關，衣著都是黑黑沉沉，睇落好鄉下人咁款，我想看看佢地手上本護照係點樣的，但角度問題始終睇唔到。

去到火車站的月台，見到我們將會座去平壤的火車，心情超興奮起的。

火車10:00am開車，經過中韓友誼橋去到北朝鮮的新義洲，沿路都可以影相，錄Viedo ，只是差不多到新義洲車站時便不可以再影，因為整個北朝鮮，影相最大的禁忌就是不可影軍人。而新義洲的月台上，有很多軍人，所以就唔比影。

火車在新義洲會停兩小時，這兩小時會有北朝鮮的關員上車檢查行李，可以落車到月台購物，月台有些北朝鮮美女推著車仔販賣北朝鮮特產和啤酒小食，都是收人民幣的。

由北韓關員上車的一刻開始，氣氛有點緊張，我不怕被沒收所帶來的物品，只是怕會被拒絕入境。因為我的護照內超過五十個日本的入境印，好驚佢地會以為我係日本間諜，而同行的朋友其中一人是在南韓工作，兩個同行朋友都是會韓語的，也不敢在關員面前說出半知句韓文，因為怕他們會誤會是南韓間諜，關員要求我們打開行李檢查，第一個被打開行李的朋友在檢查途中送了四包香港煙給關員，想不到我們四人的檢查就因為四包煙而變得簡單。很快便完成了安檢。不過佢地真係好緊張書，我們帶去的書關員是很認真地檢查的，我估其實佢地都識睇中文的。

我們在月台上買左少少野。去到北韓，第一時間想試下平壤啤酒，價錢比我想像中便宜，只需RMB6一支。

在新義洲，火車將會由中國火車頭換上北韓火車頭。

12:08pm, 火車離開新義洲，緊張的氣氛馬上消失了。我們真的向平壤出發了。

由北韓望返轉頭的丹東，前排的小屋是北韓，後面的高樓大廈係丹東。住在呢區的北韓人有咩可能唔知道外面的世界發達，不過知道又可以點？都走唔到。

我們的午餐是便當，是停在新義洲時送上火車的，雖然說不上美味，有熱的飯已經很滿足了。


沿途的風景都好靚，但看了一個多小時之後，已經開始想念WIFI，沒得上網，時間特別難過。

在呢六小時車程內，我都係坐在窗邊，睇住沿途經過的小城鎮，睇住北韓老百姓放鴨。

18:00pm, 終於到達平壤，連同中途安檢，足足7個鐘頭。(平壤快北京半小時)

平壤火車站好熱鬧，有好多人，仲有的士，我有點想不明白，北韓又沒有自由行，又共產，的士唔係資本主義的嗎？　北韓的的士，到底是誰坐的？

是日行程，返酒店，在酒店食晚餐

由平壤火車站去羊角島酒店只需大約十分鐘車程

對於本身不喜歡食韓國菜的我，晚餐實在太不合口胃，有少少沙的白飯，冷冰冰的菜，無味的大醬湯，所以食了兩口就決定放棄，返房食杯麵好了。

在酒店大堂有間小賣店，飯後去行個圈，想不到日本的產品也不少喔，唔係好憎日本鬼子的嗎？點解入咁多日本貨？　連明治Amino Collagen都有得賣。小賣店的價錢不貴。一支平壤啤酒RMB5，一支水RMB2，朝鮮幣的價錢除15就是人民幣的價錢。